Poèmes
de Jules Watteeuw (Tourcoing)
Charlotte (1881)
L'homme à Charlotte y est su in sin lit
Bin amoutchi d'in romatique :
"J'sins bin que j'vas morir, qu'y dit,
Pou mi n'a pus ni crac ni cric
Acor si j'aros l'tchoeur contint !
Mais einn saquo fait min tourmint
Acout' femm' tout bas à t'n orelle
Nou vijin, Cho Bedjin
Qui est toudi chi qui trandelle
J'sus seur que tchand que j'trai moru
Y va te t'demander in mariache
D'vant deux mois y tra raccouru
Méfie-t'! y n'a pos d'corache
Ch' est un oj'leu, ch' est un buveu
Y est toudi din les tchamps qu'y drache
Mi j'nai jomais povu l'sintir
Si te l'fais te vas t'erpintir"
Sos trrintchill va, répond Charlotte
J'ai donné m'parole à in aute.
_______________________________________________________
Le corbeau et le renard (1882)
Ch’to einn’ fos einn’ cornell’ perchie su in haleu
Ell’ teno din sin bec in morceu d’vi fromache
V’la qu’arrife in ernard erniflant du museu
Qui interprind l’ojeu din sin fin babillache :
« Bonjour p’tite cornelle ! Eh bé commint qu’i va ?
Mon di ! qu’vous èt’ joliss’ Mais quo ? Ch’est vous qui est là ?
Je n’vous r’connaicho pos ! Bin des bonjours mam’selle
Vous lujez comm’ einn’ pronn ! Mais toudi qu’vous ètes belle !
Si vous savez tchanter comm’ vous avez l’beauté
Vous ètes l’reine des bos pou l’voisse et l’jolité »
In intindant cha là l’cornell’ sins méfiance
Ouverr’ tout grand sin bec pou pousser la romance
Mais v’la que l’vi fromache tché din l’bouque de l’ernard
Qui l’avale in riant et dit d’in ton finard
« Tout flatteu, tout minteu et tout chti qui l’acoute
Eh bé tant piss’ pou li ! Déchindez j’paie la goutte »
Nou cornell’ ; feinn’ saisie et jotchant tout camus
Jura, mais un peu tard qu’on ne l’y prendrait plus.
Haleu= halot (saule)
Vi fromache= vieux Lille, variété très forte de Maroilles