Poème de Jules Mousseron

Poème de Jules Mousseron (Denain)

L'aller et r'tour

Par eun' gai pitié, in pardonne

A Cafougnett' beaucoup d' défauts.

Pourtant, c' cop-là, i n'tot pus jonne

Quand i-a pris l'train pou l' premièr' fos.

Cha n'impêch' point qu'à l' mêm' minute

Qué l' machin' du train all' saquot,

V'là mon Cafougnett' qui culbute

Din s' wagon comme un ornébot.

I n' s'attindot point à l'affaire

Bin vite i s' restamp' tout surpris

Mais l'train i fil' d'eun' tell' manière

Qué l'innochint i pouss' des cris.

Sans savoir s'i fait mal, el diale,

Etonné d'eun' parell' felté,

I s' met à hurler comme un dale,

A jurer comme un possédé :

"Millards dé qu'vaux ! comm' cha va vite !

Bon Dieu ! ch'est pus vif qué l'éclair !

Ej' pinsos d'aller à gui-guite,

J' prinds l'mors à dints sur l' quémin d' fier !

Ahu ! comme cha va, nom d'eun' pipe !

J' n'ai jamais vu cha, mille chabots !

Si l'train dérall'rot, nos pauv's tripes,

Cré vingt diap's ! dûss' qu'in l' z'artrouvrot ?

Dûss' qu'in s'in va ? In Amérique ?

Par el carreau jé n' vos pus rien !

Pus un potiau télégraphique !

Dûss' nous d'allons, sacré bon saint ? "

Et tout in jurant i s'adresse

A un bon prêtr' qui s'trouvot là :

"- Cré pétard ! In v'là eun' vitesse !

Monsieur l' curé, dûss, qu'in s'in va ?

- Où vous allez, dit l' prêtr', sévère,

Vous allez à l'enfer…! tout court !

- Bah ! cha n'fait rien, Monsieur l' vicaire :

J'ai pris m'billet d'aller et r'tour !"

retour à l'accueil